هـنعمل إيــه يا ثـورجيـة ؟

بصوا بقى عشان نجيب من الآخر ... البيان اللي هقوله ده هيه مره واحده و مش هكتر كتير ... حصل قبل كده إني حاولت أتفاهم مع الأخوه و الأخوان (مش الأخوان اللي في بالكوا بس عشان مافيش أخوات) اللي في المجلس العسكري و أفهمهم و أوعيهم على الدنيا و أعرف منهم راسنا من رجلينا بس يظهر و الله أعلم الموضوع في إنّه ..

المهم البيان كالآتي:

أيها الأخوه و الأخوات ... الثورجيه و الثورجيات ... المعتصمين و المعتصمات ... و اللي مش في الميدان بيبات

إليكم هذا النبأ العاجل

الأعتصام مش هيجيب نتيجه .. و الله لو فضلنا العمر معتصمين ... البعده جتتهم نحست مننا ... قالك سيبهم يولعوا و الناس و التجار و البياعين يولعوا فيهم كل ماخلقهم يضيق

و بعد تفكير عميق و سيحان نافوخ في الميدان يوم الجمعه اللوز اللي أخدنا فيه كلنا اللون التان اللطيف اللي عن نفسي مش بحبه بس أمري لله يا مصر ... و بعد ضربة الشمس و زوال الأعراض ... و بعد حرقة الدم و إنعدام الرد .. اللهم إلا من بيان سياده رئيس الوزراء اللي المفروض إنه واحد مننا على رأي الأخ عمرو دياب .... و بعد تصريحات سياده اللواء العيسوي اللي جابتلي الضغط و السكر و أنا لسه ما جتش 20 سنه (إحم إحم بفشر طبعا ) أحب أقولوكوا كده و على بلاطه .... التصعيــــــــــد هوه الحل الأمثل في الحالات اللي زي دي

هتسألوني هنصعد إزاي ... أقولوكوا أنا بقى بما إني مشهورة بتفكيري الشرير و نزعاتي الأجراميه و قلبي الأسود و نفسيتي الجحيم ... هقولوكوا على شوية حاجات محتاجين نفكر فيها بصوت عالي مع بعضياتنا

قبل ما أحط النقط ع الحروف و أطلع ع الروووف أوضحلكوا إننا  لازم نمهد إن فيه تصعيد و مش مسأله إعتصام إعتصام حتى يسقط النظام .. عشان إحنا أصلا مابقناش عارفين إيه النظام

 أولا : لازم نفكنا من الميدان عشان هيجيب لنا وجع الدماغ من الناس اللي لسه مش فاهمه إن اللي بيحصل ده للخير إن شاء الله .. و ده مش معناه إني عاوزه نبطل إعتصام بالعكس و في نفس الوقت نوضح لكل اللي يسألنا إن الأعتصام ده عشان نجيب حق البلد من اللي سرقوها و  نهبوها و سابوا السوس يرعى و ينخر في عمدانها

ثانيا: لازم لازم نبتدي نتحرك في نشر فكره العصيان المدني .. السوايسه رجاله و عملوها ... ياللااا بينا بقى نبين كرامه

ثالثا: عاوزين نبتدي نختار أماكن حيوية للبلد و نحاصرها ... شرايين حياه يعني ... بس كل ده بعد ما نمهد إننا ناويين على كده في حاله إننا ماعرفناش إيه النظام بقى ... ممكن مجلس الوزراء ... ممكن المطار ... و الأنيل بقى يا سلاااام لو نطلع على طره و لا شرم الشيخ ... عارفه إن المخاطره كبيره و على قد المخاطره على قد النتيجه .. بس لازم نتحرك و نبطل لوي دراع .. نضرب بونياااات على طول

رابعا: التلفزيون المصري بياع الكدب الحصري ده .. لازم يبقاله نهايه .. و يتوقفوا عند حدهم و لو وصلت إننا نحاصر المبني و المرحله التانيه إقتحااااااااااام .... و ده بقوله بعد حرقه الدم اللي شفتها و أنا مستنيه خطاب معالي سياده رئيس الوزراء ..

خامسا: لازمم نحدد مطالب واحده واضحه جليه صريحه محدده موحده من جميع الأطياف السياسيه و ممكن نفكنا من اللي باع من زمااااان و نفكنا من أي حاجه ممكن تقسمنا نصين

سادسا و ده الأهم و اللي لازم تعرفوه ... أنا ندمت لما سبنا الميدان و أظن كلنا كده ... و حزينه إني الحل اللي قدامي دلوقتي هوه التصعيد و الي بالأكيد هيشل البلد أكتر ... و إني زي ناس كتيررررررررر إتضرروا من إن مافيش شغل و فعلا الحال واقف ... بس للأسف من 5 شهور مافيش خطوه جديده ... مافيش حاجه جديده ... و الحال برضه واقف .. وقفة حال بوقفه حال يبقى نعدلها مره واحده لو هنشحت ع البيباااان

حد فهم حاجه من اللي كتبتها فوق دي؟؟؟؟؟؟؟؟؟ أصلا أنا لسه مش فاهمه برضه .... تقريبا دي تخاريف ما بعد ضربه الشمس ... فكروا فيها و لو لقيتوا حاجه غير التصعيد ممكن تبقى حل .. أنا معاكوا فيها

أأأه نسيت أقولوكوا أنا ممكن يتقبض عليه بتهمة التحريض على الشغب .. و نبي و نبي و نبي تعملولي صفحه زي وائل نجاتي و تربوا البت على بال ما أطلع من المعتقل .. و السلام ختاام
و يا رب .... النصر لـ مصر

فـي المـراية

يوم زي كل يوم بس صاحيه فيه نشاط لقيتها قاعده ساكته زي عادتها من يوم ماحصل اللي حصل بصيتلها و أنا زعلانه عليها بتشرب القهوه و كأنها بتشوفه في كل شفطه  ... قلتلها تيجي ننزل ماردتش ... شدتها من إديها و علقتلها شنطتها و أخدتها ع المكان اللي كانت دايما بتقول إنها بتحب تشوف نفسها فيه.

وصلنا الكوافير و اللي بينا كله كلام بالعيون من جوه المرايا ... بتقولي و بتلومني بعنين كسيره جبتيني هنا ليه و انا كل مره كنت باجي هنا كنت باجي عشانه بعمل كل اللي يتعمل عشان ابقى حلوه قدامه ...سألتها و أنا شايفه في عنيها كسرة القلب و نزيفه عملك إيه إبن الـ .... ؟؟؟ و ليه هوه و إشمعنا ؟؟ ده إنتي شفتي في سنين عمرك اللي قد سنين عمري اللي ماحدش شافه ... و فضلتي واقفه على رجليكي ماشوفتش منك ضعف و لا إستكانه ... من كام سنه و أنت واخده على وجع القلب و كنتي في كل مره إنتي اللي بتاخدي إيدي ... إشمعنا المره دي بقى كرهك للحياه عاده ؟؟؟ بصيتيلي ... و إتنهدتي يعني إنتي مش عارفه الحكايه؟؟؟

رديت بعين كلها غضب أيوه عرفاها ... و من الأول للأخر حذرتك من النهايه ... قلتلك بلاش هوه و إنت مش  حمل اللي ممكن يجرالك منه .. قلتي ياما دقت ع الراس طبول .. قلتلك عيونك بحبه طاله و بلاش هوه .. قلتي و نبي سيبيني ده هوه ده اللي هعوض بحبه كل اللي فات من سنيني ... سيبتك و كل يوم تيجي تجري تحكيلي و من السعاده نستيني خوفي عليكي .. شفتك طايره في دنيا بتحلمي و أنت مش شايفه الدنيا ... بتحلمي لسنين قدام و فرحتك اللي جايه ... و كان قد ماكان مخليكي بحبه معميه ... لا شفتي فروق و لا حواجز و لا ده و لا ديه

عديتي و فوتي و طنشتي و كل لما أجي أقولك خدي بالك كانت تبقى إيديكي على ودانك ... يا حبيبتي الدنيا مش حب و معشقه و اللي بالي بالك ... قلتيلي حضنه عندي بينسيني كل المهالك ... عاشوا أيام و شهور زي ملوك الممالك ... و لا شايفين و لا سامعين لقلنا و قالت ... كانت عنيها و عنيه بالفرحه و السعاده طاله

وفضلوا يحلموا لعشر سنين قدام .. و سموا العيال ... و إختاروا الصحاب و السكن و الزيارات ... حسدوهم كل اللي شافوهم و أنا أولهم .. يمكن أول مره تعرفي إني كنت من حاسدينك ... أصلكوا كنتوا لايقين أوي على بعض .. و فيكوا كتير شبه من بعض و اللي شافكوا قال قرايب مش حبايب ... و اللي يشوفكوا مايعرفكوش من بعض ... نفس الكلام .. مين فيكوا اللي بهت ع التاني مش مهم ... المهم ... إنكوا بقيتوا جوه دم بعض

قلتيلي ده مش بس حبيبي ... ده إبني اللي عمري ماهشوفله زي ... مش عاوزه أشوف حاجه في الدنيا نقصاه .. و من حضني مش مخرجاه ... ده هيفضل جوايه حمياه من الدنيا و مقالبها

شوفتك و أنت بتدلعي و بتحني ... و بحبك و عشقك عمرك ما بتضني .. ماخفتيش من عيون زي السهام في ضهرك .. لأ ماخفتش وده كان ردك ... فضلتي شايفه حضنه الأمان و المأوي ... و كل ماتيجي الفرصه تشربي من حبه لآخر نقطه .. قلتي ده مسيره هيبقى حلالي و شايفه نفسي في عنيه يا محلايا ... ياما وقفتوا قدام مرايا و قلتوا إحنا مخلوقين لبعض

و كل ما أسألك طيب حصل إيه و الحب جراله إيه مالاقيش عندك إجابه ... قلتي أزمه و قلتي هتعدي و قلتي بحكيله و قلتي بشكيله و قلتي بحاول أفهمه ... و لا عدت و لا سمع حكاوي منك و لا شكاوي و لا فهم

أنا عارفه إنك حكيتيله على اللي حصلك من يوم ماعينك ع الدنيا طلت ... كنتي كتاب مفتوح و شرحتي و وصفتي و قلتي بحب ده و بكره ده ... حاولتي توريه النور اللي جواكي و بقع الضلام .. قلتيله مش هخبي عنك حاجه ده إنت الأمان ... و كانت عنيه بتدمع لما يسمع حكاويكي .. و برضه كان كبير عليه أوي درو إنه يحتويكي

مش عارفه أقول من فيكوا ظالم ولا مين مظلوم  .. ظلمتيه لما حملتيه حمل فوق طاقته و لا ظلمك لما قال إنه قدها و قدود

ظلمتي نفسك لما قولتي هوه ده دنيتي و ديني و اللي ليه في الوجود و ماسمعتيش إعتراض لمخلوق و قفلتي قلبك و عنيكي عليه و بس ... و كل الكلام كنتي بتقوليله هس ماحدش يسمعني في حبه ملامه

و هنا كانت غلطتي أنا إني سبتك و أناأقربلك من حبل الوريد تروحي ... و فضلت أسمعك و انت بتقولي ده هوه قلبي و عقلي و عيني و روحي .. و عمره ماهيخلف وعد ... هوه بس محتاج شويه صبر و وقت

يا حبيبتي فوقي ده إنتوا فاتت عليكوا شهور دموعك أكتر من جروحك ... قلتي و ماله نتخانق بس روحي و روحه عمرها ما هتتباعد .. ده أنا بشم ريحته في جلدي ... و بشوف ملامحه في مرايتي ... و حبه بيجري جوه دمي و عروقي .. أسيبه !!!! أنتوا ليه عاوزيني أسيب الروح ؟؟ و مين فيكوا هيديني روحه بيها أعيش؟؟؟؟ و مين منكوا هيشيل الهم؟؟؟

و رجعت أبصلك تاني في المرايا .. ألاقيكي مسهمه و كأنك سامعاني و أنا بحكي الحكايه .. أنا آسفه تقريبا وجعتك و لا إنت اللي بتفتكري الحكايه .. أبص ألاقيكي في لحظه بتبتسمي و كأنك إفتكرتي أول بوسه  الشفايف ... و ثواني تانيه عنيكي من غير دموع بتبكي و كأنك إفتكرتي آخرة الحكايه ... و ساعات بدل الأبتسامه ألاقي ضحكه و كأنها ذكرى لحظه شقاوه ... و ساعات تانيه بتقى دمعه نار ع الخد لما تقولي يا ريت

كان بيدبحني سؤالك و أنت ع السرير و تقولي هوه فين ؟؟؟ إزاي سابني كده و الهم راكبني و كسر القامه ؟؟؟ مابقدرش أحوش دموعي بس قدرت أحوشك تروحيله ... كنت عاوزه تروحي إزاي و تقولي إيه ؟؟؟ كنتي عاوزه تقوليله إرجع ... و لا عاوزه تمللي منه العين ... ما إنتي يا قلبي شوفتيه شهور و أيام و ماشبعت منه العين ... طيب كنتي عاوزه تروحي ليه؟؟؟؟؟؟؟؟

تفتكري ظلمتك لما منعتك تشوفى من عيونه آخر طله ؟؟؟؟ بس كنت خايفه عليكي لما يهل عليكي الهله ... قلبك ماكنش هيستحمل .. و الله خوفي عليكي خللاني منعتك .. لو أعرف إنه هيشفي و هيطيب ماكنت حشتك .... بس تفتكري مين فينا اللي ظلمك؟

كل ماببص في المرايا بشوفك مكسوره و في قلبك مهزومه ... أنا هبطل أبص عليكي مع إنك مع كل ثانيه وشك عمال يحلو بس لما إنتي اللي بتبصي عماله تقوليلي و لو ... انا كنت حلوه معاه مهما قاللوا عليه و عادوا في حلاوتي ... يا ناااااس مش شايفه نفسي في المرايا و شايفاه هوه ... أعمل إيه يا حته من روحي قوليلي ... أبوس إديكي أنا الدمعه هتفر من عيني إرحمي نفسك و إرحميني و قومي و إقفي على رجليكي من تاني .. ده إنتي اللي ياما إديتي لحياه الكل ألوان و وجودك معاهم كان كل الأمال ... اللي باعك بيعيه و لا تبكي عليه .. و بصي كام قلب و عين مستني منك الأشاره ... و من غير ماتردي .. انا عارفه إنك مش عاوزه حاجه و يمكن نستنيه بشاره

يا ريت في الأيد كنت أجيبهولك ... يا ريت كان في إيدي أرجعهولك ... بس راح خلاص ... إنت بس اللي مش شايفه من حبه خلاص ... بس خلاااااص كده هتروحي مننا كلنا .. و اللي حصل لا منك و لا مننا

و حياة حبك ليه قومي .. و أنا عارفه إن ده الغالي اللي لو حلفتك بيه هتنوليهالي ...

بصي كده في المرايا ... شوفي ... آآه عنيكي إنطفى نورها بس لسه جميله .. شعرك طول و سواده في إزدياده ... أنا عارفه إنك هتقومي و هتبقى للدنيا زي ماكنتي دايما فراشه ... بس يمكن مانعرفش نرجعلك اللي راح ... و يمكن ... مين عارف و يا عالم هتشوفي إيه و مين تاني جوه المرايا