قالي عنيكي فيها سحر و شقاوة بنت العشرين ... قالي ياجمالها بتلمع و ليها بريق ... قالي بتضحك رغم حزن دفين
و ياما قال ...
قالي ملامحك من ملامح مصر ... لونك و شعرك و قدك و الخصر .. قالي شايله هم جبال زيها و مستنيه ساعة النصر ...
و ياما قال
قاللي لسانك حلاوته مالها مثيل... و خفة الدم تطول عمر.. و القعده معاكي مالها بديل... يارب يديني معاكي العمر
و ياما قال
قاللي حملك تقيل .. الله يعين ... تحبي أساعد و لا ماشي الحال .. ماهو أصلك قوية زي الرجال .. ياماقال
و ياما قال
قالي إبتسامتك فجر جديد ... و احلى مافيكي فرحتك بحبيب .. و كل يوم بشوفك كأنك بسمة عيد ... و يا ريت أفضل معاكي و أكونلك زي العبيد
و ياما قال
قالي فيكي حنان أكتر من حنان الأم ... و أحلى مافيكي لمسه إيديكي و الحضن ... و الدفا اللي في كل همسه ليكي و ده الأهم
و ياما قال
قالي اللي سبقوني ليكي ماعرفوا قيمتك ... و إنت عالي و غالي مقامك و لا حد يقدر يجيب في سيرتك
و ياما قال
قالي و نبي تديني فرصه ... أجرب بس مرة ... أطول النجمه اللي طاله .... و أمسك القمر البعيد
و ياما قال
قالي نفسني أشيل عنك الهم .. و لحالك و لأمورك أهتم ... و تبقي إنتي الأهم و المهم
و ياما قال
قالي يا ريتني عرفتك من زمان .. كان زمان الدنيا بالسبع ألوان ... و ماكان الحزن عرف لقلبك مكان
و ياما قال
قاللي نفسي أجيب منك ولد .. و يبقى لاخته ضهر و سند ... و بجماله يتغنى ذكر و مدد ... يارب يكونلي منك ولد .. و تبقي ست الكل و أم العيال
و ياما يــاااما قاااال
أحب المره دي انا اللي اقولك.. من غير ما عدلك ولا زيدلك... ولا كلام شرحه يطول.... الراجل بفعله مش بالقول
فضلت ورايا خطوة بخطوة .. و كان لقلبي في حبوك سطوة .. و لسانك ما تتطلع منه الهفوه .. و كلامك صدقته لآخر حرف
قلتلك مابلاش أنا ... و لا عاوزه عذاب تاني و لا ضنا ... قالي ده معايا كل الهنا ... و عمري مابعرف لا خوف و لا ضعف
قلبي العبيط يا عيني ماصدق ... بكل اللي جواه باح و دلدق ...و من السعاده يا عيني زقزق ... و اتعمت عنيه و راسي لف
رسمتك جوه العين ... و قفلت عليك الرمش ... و غطيتك بروحي ... و كان قلبي لقلبك عش
شاركتك اللقمة .. وقسمت معاك الضحكة ... و قلتهالك بعلو الحس .. انا من حبك مابتكسفش
ولما بقيت في عروقي بتجري مجرى الدم ... قاللي إنتي بقيتي كلك هم و غم ... و أنا زي ما أنا و مش بركب وش
طب و أنا إيه عليه جد ؟؟؟ مش عاوزه أبقي ليه زي أي حد ... مش عاوزه أشوف بينا سور إتمد ... و هوه ده يزعل بجد؟؟
قعدت ترمي عليه حمل الفشل ... و كل كلمه أو فعل مني كان علل ... مهما عملت لك برضه ملل
عرفت ساعتها و بس إيه اللي جرى ... ماهو اللي كان قدامك دلوقتي بقى ورا ... و اللي حلمت بيه بقى في الأيد .. يبقى ليه تتعب نفسك و تدور ع الرضا
غلطت أنا لما خليتك تاج للراس ... وقلت مش عاوزة من الدنيا حاجة .... و عملت عيوني و القلب و الروح ليك حراس ... وانت ولا قدمت حاجة
بس في الآخر أنا اللي عليه العتب ... و بقيت لقلبي زي الأتب ... و مرة على مرة علمتني الأدب ... و خلاص مابقاش و لا حاجة
و مات الكلام و مهما قلت تاني .. خلاص راحت أحلامك و أحلامي...و أهي ضاعت منك أحلى حاجة ... و هي دي قمة العدالة ... القلب وحده يفضل .... و تخلص القوالة
ليست هناك تعليقات:
إرسال تعليق