إحنا بتوع الـ FaceBook

المقدمــــة

دة مش الجزء التاني من فيلم "إحنا بتوع الأوتوبيس" ده تسجيل و تدوين و تلخيص و محاولة لسرد الأحداث بطريقة مختلفة.
بمنتهى الصراحة و الفخر و الفرحة بقولوكوا بعلو الصوت إحنا بتوع الـ Facebook إحنا بتوع 25 يناير 2011 ... إحنا الشباب ال لا حزبي ال لا إخواني ال لا حكومي اللي أشعل فتيل الثورة التي لا تظل قائمة حتى تاريخ كتابتي للأسطر دي ....
إبتديت أحس نفسي بتكلم كلام كبير كدة مالوش لازمة عشان كدة أنا هجيب من الآخر و أقولوكوا الأحداث زي ما حصلت و زي ما تطورت التطور الطبيعي للحاجة للحرية و الحياة الأنسانية
أبتدي منين ... أبتدي منين ... أكيد مش هكتبلكوا قصة حياتي ... لكن كمان لازم تبقوا عارفين أنا مين ... مين دي اللي هنقرا اللي بتكتبة ... تطلع مين دي اللي جاية بتتكلم نيابة عن شباب الـ Facebook اللي بالملايين ...
أنا موللي أو أمل .... واحدة من ضمن الملايين اللي ما شافوش ليهم رئيس عدا السيد مبارك.... من اللي عايشيين زي اللي عايشين... من اللي إنهاردة زي بكرة زي بعدة .... واللي نبات فيه بنصحى فيه.. جري ورا لقمة العيش و تعليم العيال و جنون الأسعار و هبل الأخبار و عبط القادة ...من اللي شافوا فرصهم بتضيع لشوية جرابيع بواسطة...من اللي سمعوا أرقام فلكية لمرتبات أشخاص عجيبة...من اللى شافوا الفساد و المرض و الجهل و الكبت والتلوث و سرقة و بطالة و محسوبية إتفشوا زي السرطان... ممكن أبقي أقولوكوا الباقي بينا و بين بعضينا ... كتير سألوني هتشاركي في المظاهرات ليه ؟؟  إنتي كمان عاوزة تمشي الريس؟؟؟
أسباب إشتراكي في المظاهرات هقولها أكيد بس مش دلوقتي .. هتلاقوها بتظهر في وسط الأحداث ..

البدايـــــــــة

أنا هبتدى من يوم 31/12/2010 إحتفلنا بالسنة الجديدة إحتفال عائلي لطيف و طفينا النور الساعة 12 باليل و ييييه لقيت نفسي ببوس أمي!!! ماليش نفس أنا أبوسها زي كل سنة هوه ما فيش مرة تبقى البوسة أحسن من كدة شوية؟؟؟
ما علينا و هوه إيه الجديد ما أنا من يوم طلاقي من أكتر من سبع سنين و أنا كل سنة ببوس أمي!!!!!!
علي حوالي الساعة 12:30 و مع أول ساعات السنة الجديدة قلت يا بت إدخلي online شوفي صحابك و ألعبي Cafe World -لعبتي المفضلة من ساعة ما سبت شغلي- لاقيت خبر مش لطيف .. دوي إنفجار في الأسكندرية و لم يتم تحديد الأسباب ... تصدقوا و تؤمنوا بالله إتخضيت عليه الطلاق إتخضيت ... فضلت أتابع كل حاجة لحد ما كتبوا إنفجار بكنيسة القديسين بالأسكندرية !!!!!!!! يا نهار إسود ... دخلت صحيت أمي .. عاجبك كدة .. دي نتيجة طبيعية لسنة أبتديها ببوسة منك ... منك لله يا ماما!!!
رحت مكلمة لوزة قلبي - مش هقول إسمه يا حشريين - بما إنة من سكان شبرا المعروف إنها مليانة أقباط و تقريبا كل أصحابنا أقباط ، إلحق يا تيمو - أديني قلت إسمه - في كنيسة إنفجرت في أليكس .... يا جدعان إلحقوا في كنيسة إنفجرت في أليكس - بيحاول يوصلهم الخبر المشئوم وسط هيصة رأس السنة - تقريبا مالقاش رد الفعل اللي كان مستنيه فقالي طب تابعي الأخبار و بلغيني !!!! - أصل أنا متابع الأخبار بتاع حضرته - المهم فضلت أتفرج و أتابع و كل شوية ينزل فيديو يقطع القلب لما إنهرت و نمت و أنا بعيط و هموت من الرعب من ردة الفعل على الحدث.
و فعلا إبتدت الأخبار تتكلم عن مظاهرات و مواجهات بين الشرطة و الغاضبين من الأقباط و المسلمين اللى مش عاجبعهم إن كل شوية نلعب لعبة الفتنة عشان نولع في بعض بدل ما نولع في الحكومة ... يا أخي الحكومة دي صايعة صياعة .. يا إما نتخانق مع بعض يا إما نتخانق في الماتشات يا إما نمسك في خناق الجرائر يا إما كل واحد يخانق دبان وشه بس المهم ما نبصش بيعملوا إيه ... ولاد لعيبة يعني.....
المهم بعدها بكام يوم لقيت خبر دمه سم على قلبي .. وفاة المواطن السلفي / السيد بلال بعد تعذيبة في الأسكندرية عشان يعترف إنه ورا تفجير الكنيسة!!!!  لا حول و لا قوة إلا بالله ... يعني لو كان إعترف إنه وراها و لا قدامها كانت هتفرق و مش هيموتوه ؟؟؟؟
لاقيت صفحة "كلنا خالد سعيد" - الشاب اللي مات من تعذيب رجال الداخلية دون ذنب- بيتبنوا قضية السيد بلال ... و جاتلهم فكرة صايعة أوي و عجبتني أوى بما إني من مشجعي الصياعة .. إننا ننكد على الأخوة ظباط الداخلية في عيدهم .... هيــه هيــــه أنا ما أحب ما على قلبي أنكد عليهم - طليقي ظابط شرطة- و طالبوا الشباب إننا ننزل في مسيرات و مظاهرات تندد - حلوة تندد دي - بممارسات الشرطة و تطالب بإقالة السيد المبجل الأنسان الطيب الوزير -السابق حاليا هيهيهيهي- حبيب الملايين / حبيب العادلي .....
عجبتنــــي موت الحكاية دي بصراحة ولو إني عارفة إن ريسنا حبيبنا هيعمل ودن من طين و ودن من عجين -كالعادة يعني- هوه من إمتى قلناله شيل فلان و  شاله؟؟؟؟ بالعكس ده بيخليه قاعد على قلوبنا العمر بطوله -ما حدش بيموت فيهم ولاد الأيه- هيدفنونا قبل ما يمشوا...
في نفس الوقت ده كانت تونس مولعاها .. مظاهرات و مسيرات و الأهرام و التلفزيون المصري و لا الهوى .... و إذ فجأتن و أنا في يوم كدة خارجة مع لوزة قلبي - إسمه فوق يا اللي مش متابع- لقيت موبايلي بيرن "ست الحبايب" -طبعا توقعتوا مين على التليفون!!!! قلت آه هنبتدي بقى مسلسل الأسئلة و التعليمات .. جاية إمتى؟ ما تتأخرييش...هاتي عيش و أنتي جاية... روحت على التليفون و كلي إحباط ...
- أيوة يا ماما
- مبروك يا موللى
-على إيه (وأنا بجز على شفايفي)
- ثورة تونس نجحت زين العابدين بن علي هرب و ساب تونس
-الله أكبر الله أكبر عقبالنا عقبالنا .... سلام يا حاجة
بلغت الخبر و فوجئت بسعادة عارمة من الجميع ختى لوزة قلبي وقف يرقص و يتنطط - مابيعملش كدة لما بيشوفني إبن اللذينة- و كله على لسانة كلمة واحدة ... عقبالنـــــــــــــــــــــــــــــــــــــــا
النت كلة فيديوهات عن الثورة ... و أهمهم الفيديو الشهير ... بن علي هرب الجبان هرب الشعب التونسي حر أحرار يا توانسة ... اول حاجة تحسها من الفيديو كمية سعادة و كأنك شامم ريحة الحرية
طبعا كدة الدنيا إتغيرت .. قوم إيه طلعوا علينا بتوع "كلنا خالد سعيد" بإقتراح جديد ... بدل ما ننكد على الداخلية بس ... و بدل ما نقول إقالة حبيب العادلي بس إحنا نطالب بإسقاط النظام كله!!!!!!!!!!!!! يا ولاد الأيـــه و جون و جون و جون ..... جامدة دي ....
هنطلع في مسيرات و مظاهرات ضد الغلاء و الفساد و الفقر والظلم و البطالة كلنا يوم 25 يناير/2011
فضلت أتابع كل الآراء اللي مع و اللي ضد - ولا ون ضد دي تقريبا ما كانتش موجودة- و فوجئت الصراحة بشوية شباب سيس -هيهيهيهيي- طالعين يقولوا إيه بقى قال إيه هيعملوا يوم 25 - نفس 25 اللي فوق- مسيرات مؤيدة للريس و تجديد مبايعة  تحت إسم "مبارك أمان مصر"!!!!
يا ولاد الصايعة ملعوبة منكم يا شباب الحزب الوطني ... و طلعلك الباشا / حبيب العادلي بيجدد المبايعة للسيد الرئيس -هيهيهيهيهيهي- صايع برضة . المهم فضلت أتابع إني أشوف حاجة في جرنال الأهرام - جريدة أمي المفضلة- أو في التلفزيون المصري الجميل الطعم عن الكلام اللي إحنا هاريين روحنا فيه أبدا يا أخي كاننا في وادي و هم في وادي تاني ... كأن في إتنين مصر ... مصر بتاعيتنا اللي كلها فساد و بطالة و إنتهاكات شرطية و مصر بتاعتهم "مصر مبارك" اللي كلها رخاء و أمان و عز -مش قصدي أحمد عز بتاع الحديد- نجاح للخطط التنموية و ديوقراطية و... و... و.... وفيها حاجات جميلة و لذيذة و أمورة!!!
و كل ما يقرب يوم 25 كل ما أعصابي تسيب - إلحقيني يامة هيعتقلوني- قوم قلت أروح لـ حبيبة قلبي و أنتيمتي و صاحبة عمري و أديها الوصاية بتاعتي في حال أن تم إعتقالي -قال يعني أنا مناضلة عظيمة يعني- روحتيلها و إديتها كل password  بتاعتي و الكريدت كاردز -كلها ديون أصلا- و وصيتها كام وصية تقطع القلب و هي تجاهلت الكلام دة و قالتلي ربنا مش هيسيبني لوحدي و مش هيهون عليه يخليني أعيش في الدنيا دي من غيرك -رومانسية موت بنت الأيه- سبتها و روحت و أنا برضة جوايه خوف عجيب و خصوصا إن ما ليش دور سياسي .. و لا عمري مشيت في مظاهرة ...أينعم أنا غاوية سياسة و من أشد المعجبين بـ إبراهيم عيسى و نوارة نجم و أبوها الفاجومي و بلال فضل و كل الناس الحلوة دي و أسامي كتير من اللي مالهومش في التطبيل... إلا إن كل دة ما يمنعش رعبي من اللي ممكن يحصلي أوإني أتعرض للى بنسمع عنة من قمع و ممارسات عنيفة ضد أي بوني آدم يفتح فمه بكلمة ضد الحكومة .. و فضلت أفتكر اللي كنت بسمعة عن اللي بيحصل للبنات اللي بيتقبض عليهم -يا مصيبتـــي هيغتصبوني- و رجعتلي الذاكرة السينمائية كلها كأن كان عندي زهايمـــر و إتعالجت و إفتكرت كل الأفلام اللي فيها مشاهد تعذيب من الكرنك للـ برئ لحد آخر القائمة السودة اللي مالهاش آخر....
و في آخر ليلة قبل المجهول اللي أنا رايحاله بكرة فتحت الـ Lap Top و بعت رسالتين أنيل من بعض .. واحدة لتوأم روحي -مون مون- و التانية للوزة قلبي ... حاجة كدة عبارة عن ميكس عواطف على شحتفة و دموع و وصايا و كلام يقطع القلب.. إيـــه ياللا .... و كنت عارفة إن و لا واحد فيهم هيشوفها قبل يوم 26 يناير...
و في المرحلة اللي جاية هكتبلوكوا الأحداث بالترتيب و زي ما حصلت بدون زيادة أو نقصان و زي ما سجلتها يوم بيوم ..و من أول يوم إلى ما شاء الله.....