إحنا بتوع الـ FaceBook - أول أيام الغضب

أول أيام الغضــــب 25/01/2011

صحيت بدري زي عادتي قبل ما أنضم لطابور العاطلين –قبل اليوم ده بشهرين و نص- ما صحيتش عشان خاطر عيون يوم الغضب بالعكس صحيت لأني ما نمتش أصلا من كتر التفكير في كل سيناريو ممكن يحصل و الشيطان ما سبنيش في حالي كتر خيره إداني مليون مشهد سينمائي حصل أو ما حصلش عشان ينكد عليه و معرفش أنام.

قمت طسيت وشي بالمية و لبست طقم المظاهرة اللي بحضر فيه بقالي يومين عشان أضمن إنه مريح وشيك –كعادتي طبعا- ونعمدت أتحرك في منتهى الهدوء عشان كلة يفضل نايم ... قوم فجأة و على حين غره أسمعلك خير اللهم إجعله خير سؤال مش غريب على وداني:

إنتي بتلبسي و رايحة فين؟؟

رايحة المظاهرات يا حاجة منا قايلالك من بدري

إنتي مش هتعقلي بقى .. إنتي عندك بنت

يا ستي فاكرة و الله و عشانها هروح

مش هطول عليكوا في حوار بيحصل لو نازلة أشتري باكو لبان المهم كانت آخرته لو روحتي قلبي و ربي غضبانين عليكي ... كملت لبسي و بست الأيادي و قلتلها إدعيلي أرجع بحق كل واحد مننا حتى اللي ما عندوش مظلمه.

نزلت و كل عضلة فية بتترعش من الرعب ما حستش إني إبتديت أرتاح إلا لما قابلت لوزتي و إتفقنا نقابل كل صحابنا و نطلع على النقطة الأولى لجولة الغضب هنبتدي من دوران شبرا يا ولاد .. معاد المظاهرة كان 2 الظهر و صلنا بعد المعاد بحوالي ربع أو نص ساعة و معانا واحد بس –ميجو- كل أعوانك باعوك يا ريتشارد... و اول ما وصلنا يا هول ما رأينا –يمكن عشان أول مرة مظاهرات- حوالي 10000 بني آدم و حواليهم زيهم أمن مركزي ....أنا عن نفسي ذهلت و إتخضيت و مسكت إيد لوزتي جامد من الرعب –فال يعني-  و أحلى حاجة بقى الأمن مش بيمنعك تدخل إدخل يا حبيبي ده إنتوا هتتروقوا –والله  كنت شايفاها في عنيهم- المهم و قفنا و هتفنا و النعمة هتفت من كل قلبي "حسني مبارك – باطل ، أمن الدوله – باطل ، الإنتخابات – باطل" و فضلت أصور بنات و ولاد رجاله و ستات و بصراحه كنت مركزة على الجنس اللطيف بكافة أشكاله –عنصرية- عشان أثبت للي خلفتني أنة أهوه عادي ...

فضلنا في الوقفة دي نصاية مثلا و سمعناهم بيقولوا في التحرير الناس بتضرب هناك ... و نبي يا أخويا مالحقوا يكملوا الكلمة فجأة لقيت نفسي في شارع تاني –عرفت بعدين إن أسمه خلوصي- إزاي ؟؟ والله ماعرف بس فقدت الأحساس لثواني و فوقت و لوزة بيقولي خليكي على الرصيف .. فين ميجو؟؟؟ لقينا ميجو يا عين أمه جوة مكان إية هوه الله أعلم...محل مدخل عمارة مجمعتش ساعتها المهم  إننا لاقيناه... و بضربلكوا بعيني على الشارع  شفت عصيان مرفوعة و بتنزل بمنتهى العنف على أي حد في أي مكان أين ما كان سنه شكلة طوله عرضه .... لقيت عساكرالأمن المركزي كأنهم جلادين الحرية عاملين زي عرايس الماريونيت  بتتحرك بخيوط شفافة في حركة منظمة ... آلات سحق بشرية ...فتحت الكاميرا و قررت أسجل كل لحظة ما بين اللي بيتسحل و اللي بينزف واحد يقولي صوري يا بنتي صوري ..واحد يقولي بلاش لحسن يزعلوكي!!!! يزعلوني مين ده أنا أزعل بلد –حتى إسألوا لوزتي- و المعركة مستمرة ما بين متظاهرين جايين من شمالي و جحافل الأمن المركزي من يميني و كأني بتفرج على وليام ولاس في ملحمة Brave Heart  و لوزة كل اللى همه بطلي تصوير يا موللي .. كفاية يا موللي .ززبس يا موللي... لدرجة إن كل فيديو لازم يبقي دي كلمة النهاية بتاعته.... قررنا ننفد بجلدنا و طبعا حجتهم إنتي بنت ما ينفعش نسيبك تضربي ... قال يعنـــي خايفين عليه ماشي هفوتها ... طب ياللا بينا تحرير يا ولاد ؟؟ بصولي في ذهول هوه إنتي لسه ماتهديتيـــش يا بعيده؟؟؟ هوه إنتوا فاكرين إن هنيجي مظاهرة و هيدونا وردة؟؟؟ لسه هيبصوا لبعض رحت موقفة تاكسي تحرير؟؟ إتفضلوا... يظهر الساذج لسه ما عرفش اللي هناك –هيهيهيهيهي-  وصلنا عند المتحف و الراجل نزلنا و خدناها مشي و أنا شايفة على مرمى العين أمن مركزي و لا كأننا في حرب مشينا مسافة محترمة كل ما نقرب أسمع صوت عمال يعلى مع كل خطوة الصوت بيعلى "يسقط يسقط حسني مبارك" مصدقتش وداني و كأني في حلم حلمته سنيــن .. يا نهاركو اللي مش فايت يا جدعان  ده إنتو هتكلوا ضرب و إحنا معاكو إنما شكلها علقة لـــــوز العنب...

وصلنا الميدان أخيرا أحمدك و أشكر فضلك يا رب أصلي نسيت أقولوكوا أنا مش من هواة المشي خالص مالص يعني ... و ذهلت مما رأيت !! آه ذهلت بس غير ذهلت بتاعة شبرا .. إيــــه الناس دي كلها ؟؟ مين كل دول ؟؟ إتلموا إزاي؟؟ عددهم أد إيه؟؟؟ دول 10 أضعاف مظاهرة شبرا ؟؟ كويس مش هنضرب بسهوله...إلا صحيح هوه كل دول facebook ؟؟؟ مش ممكـــن!!!! و كعادته السامية الراقية المتعالية المتغطرسة الأمن مش بيمنعك تدخل ... إدخل يا حبيبي .. تحالى لحمو يا بابا ...إستجمعنا الشجاعة و دخلنا و فضلنا نهتف بكل ما اوتينا من قوة بكل ما إدخرنا من كبت بكل ما فقدنا من حماس على مدار السنين العجاف.... إكتشفت إن جوه كل واحد فينا حلم إتكسر أمل إتسرق بكرة ضايع إمبارح بهتان .... كلنا إشتركنا في حاجة واحدة ... عاوزين نبقى بني آدمين ... إيه كتيرعلينا؟؟؟

شوفت وشوش كتير معروفة بالنسبالي ... بثينة كامل .. جميلة إسماعيل ... أيمن نور .. عمرو واكد ... و من أكثر ماسعدت برؤيته كان إبراهيم عيسى ... إختفى الخوف اللي جواية ما بيظهرش إلا لما أسمع صفافير و دي كان معناها إن الضرب شغال على أطراف الميدان-ما أنا إتعلمت من موقعة شبرا-  و تسمع كله في نفس واحد بيطالب الناس بالرجوع "إرجع إرجع" و ما يستدرجهمش الأمن لأي شارع ضيق يسهل فيه تفتيتهم ... لأ تصدقوا كنت بتخض برضوا لما أسمع صوت القنبلة المسيلة للدموع و ساعتها الهتاف يختلف "إثبت إثبت" ده عشان ما يحصلش تدافع بشري مفزع يؤدي لكارثة –بقيتي خبرة يا بت يا موللي-  و أنا مش عارفة هيه أصلا بتترمي ليه؟ الناس بتهتف وبس ما حدش حرك ورقة من مكانها ... و الأجابة المنطقية إن عندهم مخزون بزيادة فبيتخلصوا منه ... المهم إنك لما تبص حواليك تشوف ناس كتير كأنك شايفهم قبل كده بس شفتهم فين ما تعرفش؟؟؟ ما بتلحقش تركز من سرعة الأحداث و الحماس.. بس الحاجة الوحيدة اللي معروفة إنهم كلهم مصريين... اللي بدقن و اللي بجلابية .. اللي بشعرها و اللي منقبة ..أطفال شباب شيوخ ..كل الأعمار كل المستويات... ما فيش إخوان ما فيش أحزاب اللهم إلا قلة من البشر رافعين علم الوفد بس كل الشباب طالبوهم ينزلوه ...
وإكتسفت إن لعبة المظاهرات هيه عبارة عن مسألة كر و فر ... لما نسمع الصفافير يبقى فيه ضرب ... ما نجريش بس لازم نتراجع ببطئ بعيد عن الضرب .. أول ما الضرب يوقف نيتدي نتقدم تاني ...

أذن علينا المغرب و كل شوية نشوف واحد مصاب و بيجروا بيه على مجموعة متطوعة من الدكاترة علي الرصيف عشان يتم إسعافهم ... قررنا نمشي بكرامتنا بدل ما نتمرمط ...و الليله شكلها مطولة و إتفقنا من غير إتفاق إننا راجعين تاني...

روحت بيتنا و لقيت الست الوالدة دايسها قطر و مملوؤة بالفزع ..موبايلك مقفول يا هانم ... يا ستي أبدا ... أتاري ولاد الأيه قاطعين الشبكة في التحريــر يا نهار صياعة ...حتى أنت يا ساويرس ؟؟؟ و فودافون اللي مالتي ناشيونال؟؟ وإتصالات الأماراتية؟؟؟ يخرب بيتك يا حكومة واصلة ... هديت الحاجة لما شافتني سليمة و انا إبتديت أمارس هوايتي على FaceBook حطيت الصور و كام فيديو و فجأة ألاقيلك مكتوب "المتظاهرين يحتاجون إلى طعام و أغطية" يا نهار مش فايت رفاق الكفاح و الهتاف يعوزوا حاجة و أنا ما جيبهاش ... و حياتكوا زي ما أنا من الصبح حطيت الشنطة و سمعت المحاضرة و الدعوة إياها و تاكسيييي.. التحرير لو سمحت ... وصلت و كان لوزتي هناك مع كل الشلة ... الأندال كلهم بعد ما إطمنوا إن الضرب هدي قال راحوا يؤازروا الثوار ... وزعنا الحاجة اللي جبتها و صرفت عليها دم قلبي... أينعم دم قلبي حد معترض؟؟؟ وفوجئت و أنا بوزع الميه المعدنية اللي إشترتها من حر مالي بإعلامية مش هقول إسمها بتقولي ممكن إزازة ... أكيد طبعا يا فندم ده أنا جايباهالك أصلا .. أخدت الأزازة و لا كأني عملت حاجة ....ماشي كله عشانك يا مصر ... لقيتها بتندهلي تاني ....لأ فهمتيني غلط همه كام إزازة ده أنا عواطلية بلا دخل ... ميلت عليه و قالتلي في حد إداني 500 جنيه ممكن تجيبيلنا بيهم أدوات طبية زي الخيوط الحرير و الماسكات عشان الغاز المسيل و إتصرفي في الباقي هاتي ميه هاتي أكل أي حاجة....كل الكلام ده و صحابي مذهولين .. إشمعنا إنتي؟؟؟؟ يا جهلة شكلي محل ثقة و بنت ناس كدة مش جربوعة......مشينا أكتر من ساعة و نص إننا نلاقي أي حاجة أبـــــــدا .. اللهم إلا 18 كمامة و الصيدلي الساذج يقولي أنا مش فاهم الطلب ليه زاد عليهم فجأة!!!!!إيـــه يا عم الحاج بينك و بين الميدان كام متر و مش حاسس....شعب ليه العجب .....رجعنا و أدور على الست أبدا مش لقياها..وزعنا الكام كمامة العمي اللي معانا و إتفقت مع لوزتي يجيب بالفلوس باقي الحاجة تاني يوم....و روحت و يا ريتني ما روحت و الله بقولها من كل قلبي....دخلت بيتنا على 12 باليل و فوجئت بكل تعبيرات الفزع على وش أمي....في إيــه؟؟؟قالتلي هاجموا كل المعتصمين و فضوهم بالقوة و المصابين كتير و 3 إتوفوا من ضمنهم بنت و كل اللي في دماغي إنها إنتي ده غير واحد من الأمن!!!!!!!!!!!!!!!!! أنا لسة سايباهم يا ريتني فضلت ياريتنــــــــي فضلت ... وجواية إحساس إني خنتهم لما مشيت ... قل عددهم واحد كان ممكن ينفعهم .... بس ... مشيت و سبتهم و مش مسامحه نفسي